(උප මාතෘකාව - අවදිව සිටින්නාගේ සිහිනය)
නිදන්ට ගොස් වැතිරුනු කල යහනේ
නින්ද නොදී මා වළකන සිහිනේ
රෑ තුන්යම නොනිදා නිදි යහනේ
අවදිව සිටියදි මා දු‍ටු සිහිනේ
කිසි දිනෙකත් එලි නොවෙනා සිහිනේ
සැබෑ ලොවේ මා නොදකින සිහිනේ
දිවියට වෙර වීරිය දෙන සිහිනේ
සැබෑ වෙයන් මතුදා ඒ සිහිනේ
සැම දින එක ලෙස නොදකින සිහිනේ
පසුපස යනවිට පැන යන සිහිනේ
පැන යන විට පසුපස එන සිහිනේ
සැබෑ වෙයන් මතුදා ඒ සිහිනේ
සිතට තුරුලුවී හිනැහෙන සිහිනේ
යළි සිත තනිකොට හඬවන සිහිනේ
සිනා කඳුලු එක ලෙස දෙන සිහිනේ
සැබෑ වෙයන් මතුදා ඒ සිහිනේ
අහස උසට මා ඔසවන සිහිනේ
යළි එකවර බිම ඇද ලන සිහිනේ
කිසිවිට මා හැර නොයනා සිහිනේ
සැබෑ වෙයන් මතුදා ඒ සිහිනේ
දුරු රටකට මා කැඳවන සිහිනේ
මා එහි තනිකර පැන යන සිහිනේ
ඈත සිටන් අත වනනා සිහිනේ
සැබෑ වෙයන් මතුදා ඒ සිහිනේ
දිවි ගමනට මග පෙන්වන සිහිනේ
යළිදු අතරමං කර ලන සිහිනේ
මගෙ තනියට ළඟ ගැවසෙන සිහිනේ
සැබෑ වෙයන් මතුදා ඒ සිහිනේ
No comments:
Post a Comment